విధుల్లో ఉండగా మహిళా ప్రయాణికురాలి తోపుడుకు గురై, హైదరాబాద్లో చికిత్స పొందుతూ మరణించిన 24 ఏళ్ల తెలంగాణ ఆర్టీసీ మహిళా కండక్టర్ గుండ్ల ప్రవళిక కుటుంబానికి ప్రభుత్వం అండగా నిలుస్తుంది. ముఖ్యమంత్రి రేవంత్రెడ్డి ఆదేశాల మేరకు రూ.10 లక్షల పరిహారం, ఆమె తల్లికి ప్రభుత్వ ఉద్యోగం, ఇందిరమ్మ ఇల్లు మంజూరు చేస్తున్నట్లు మంత్రి పొన్నం ప్రభాకర్ ప్రకటించారు.
భద్రాద్రి జిల్లా మణుగూరు డిపోలో పనిచేస్తున్న ప్రవళిక విధి నిర్వహణలో ఉండగా చిల్లర డబ్బుల విషయంలో ఓ మహిళా ప్రయాణికురాలితో వివాదం జరిగింది. ఈ క్రమంలో ప్రయాణికురాలు ఆమెను కదులుతున్న బస్సులో నుంచి తోసేయడంతో తీవ్రంగా గాయపడింది. బస్సు వెనుక చక్రాలు కాళ్లపై నుంచి వెళ్లడంతో పరిస్థితి విషమించింది. మెరుగైన చికిత్స కోసం హైదరాబాద్కు తరలించగా, పది రోజుల పాటు మృత్యువుతో పోరాడి ఆమె కన్నుమూసింది. ప్రవళిక మృతదేహాన్ని మణుగూరుకు తరలించగా కుటుంబ సభ్యులు, తోటి ఉద్యోగులు ఘనంగా నివాళులర్పించారు. అనంతరం కట్టుమల్లారం వద్ద అంత్యక్రియలు నిర్వహించారు. ఆమె మృతికి నిరసనగా ఖమ్మం రీజియన్లో ఆర్టీసీ ఉద్యోగులు విధులు బహిష్కరించి, బస్సుల బంద్ చేపట్టారు. రాష్ట్రవ్యాప్తంగా ఉద్యోగులు నల్లబ్యాడ్జీలు ధరించి నిరసన తెలిపారు. ముఖ్యమంత్రి రేవంత్రెడ్డి ప్రవళిక మృతిపై తీవ్ర దిగ్భ్రాంతి వ్యక్తం చేశారు. ప్రభుత్వం తరఫున రూ.10 లక్షల పరిహారం, ఆమె తల్లికి ప్రభుత్వ ఉద్యోగం, ఇందిరమ్మ ఇల్లు మంజూరు చేస్తామని మంత్రి పొన్నం ప్రభాకర్ ప్రకటించారు. ఆర్టీసీ తరఫున ప్రమాద బీమా కింద మరో రూ.కోటి అందించనున్నట్లు తెలిపారు. ప్రవళికను బస్సులో నుంచి తోసేసినట్లు ఆరోపణలు ఎదుర్కొంటున్న మహిళపై పోలీసులు తొలుత హత్యాయత్నం కేసు నమోదు చేయగా, ఆమె మృతి అనంతరం హత్య కేసుగా మార్చారు.